الأحد، مارس 15، 2009

من اشتغالات الزمن ده

الاشتغاله الأولى

****************



مش معقول !!

هايسيبو لسانى يقول

و اشتم و أبرطع على راحتى عرض

و طول

"هاتلف و ترجع على كفى"

زوغان زوغان

"الأرض بحالها ما هتكفى"

ماذا تريد الغندورة التى كانت تطل من شباك المشربية فأصبحت تطل من شباك البى إم؟

انا عايزه اتجوز ميكانيكى

بيشرب م القهوه الساده دى

و مش مهم بيعرف فرق التاء م التى

م التين م الدين

زوغان زوغان

"الأرض بحالها ما هتكفيك

شوف فرق كفى من كفيك"

ع الناصيه واقف واد أصلع شغال سمسار

بيبصلى البصه اياها تلقانى انهار

"انا عايزه اتجوز سمسار"

على ناصية شارع الرقص و الشخلعه

مافيش عوالم م اللى كانوا بيعروا جسمهم و هما متغطين ببعضهم

فيه عربيات خلايجه ركباها بناتنا

و اتَّك على نون النسب

من ذا الذى أكلنا زيت

من ذا الذى شربنا فول

و ام الخلول

من ذا الذى خلانا سوس

من ذا الذى وَقَف البلاد

لوِلد وِلد ولد الولد

"على شوقك جعجع قول

هتلف و ترجع على كفى"

زوغان زوغان

"الأرض بحالها ما هتكفى"

- بقولِك ايه .. تيجى نعمل زى جدى و جدتك و ناكل ترمس و ضره؟

تيجى نعمل زيهم و يبقى أكتر حاجه بنعملها و احنا بنرتجف بوسه؟

تيجى نعمل زيهم و نحب؟

- ناوى تهبب ايه .. سامع .. أرهف السمع فما فى القول اشتغاله

"هتلف و ترجع على كفى

وقت اما أعوز

هاطبق على روحك بخوامسى

هاتفلفص فين

الدنيا بحالها ما هتكفى"

يا راجل

عيب دا الناصر يدى الاشتغاله أهميه و يمسكها ناصية شارع الرقص و الشخلعه و يأدب بيها البُرمجيَّه

"مجعمزُ انت .. و ليس من الأمر مفر

فأنا كمصيدة و انت كفأر

سأعصرك عصرا لو تذكرت أو ذكرت كلمة ثأر"

قال إيه يا عم الحاج

عمال اوزن ف قصايد

و اعمل للصوره مصايد

و اعمل نفسى بحب

طب ازاى و انا قاعد على كف صاحبنا

راكن أوراقى على صابع

و اقلامى على صابع

و خيال حبيبتى على صابع

و شوية حجج على صابع

و بالنسبه للوسطى لامؤاخذه يعنى و غصبن عنى

عشانى

هناك 10 تعليقات:

جسر الى الحياة يقول...

والله مش عارفة اقولك ايه يمكن لانك بتوصف حال قائم فعلا بس اتمنى نقدر نغير الواقع ده عشان نقدر نعيش حياة ليها معنى ؛بس مش معاجبنى الوسطى تبقى ليك لاء تبقى للزمن الغبى اللى مرر حياتنا

دمت متفائل يا شاعر

Soul.o0o.Whisper يقول...

السلام عليكم و رحمة الله و بركاته

أولا : متأسفة خالص بجد على التأخير
غصب عنى

ثانيا : ليه مش جيت الاجتماع
لعله خير ان شاء الله

ثالثا : حقيقى القصيدة بترسم الواقع
حال كتير من البنات اللى بنشوفهم النهاردة كدا
بس بردوا ما تنكرش انحال كتير من الشباب بئا كدا بردوا

المعظم بيبص للمظهر و مقياس الدنيا

بس بردوا لا يمنع ان لسه فى ناس كويسة
لا تفقد الامل




دمت بود

محمد أبو الفتوح يقول...

جسر الحياه
معرفش ليه لما بشوف تعليقك بنبسط
انا متفائل و الله
عارفه لو انا مش زوغان زوغان و بجرى من بين صوابع الإيد اللى عايزه تفعصنى ماكنتش هابقى متفائل
soul whisper
وعليكم السلام و رحمة الله و بركاته
أولا : و لا يهمك أنا كمان للأسف بتأخر عليكى
ثانيا : :) خير ان شاء الله .. راحت عليه نومه :)
ثالثا : لو بطلنا نحلم نموت

جسر الى الحياة يقول...

ربنا يبسطك يا محمد... ويزيدك تفاؤل ان شالله... انا كمان لما باقرا لك بانبسط ولما باشوف تعليقك بانبسط اكتر
تعرف انا جيت هنا ولما لقيتك مش كاتب حاجة بعد الاشتغالة الاولى قلقت لقيتك رديت على التعليقات اطمنت انك بخير

يا رب دايما بخير ومتفائل

عبد الحميد محمود يقول...

هنا (شاعر عاميه) من العيار الثقيل

شاعر مهم تعرفه

ازيك يا محمد باشا

فاكرني ؟؟

غير معرف يقول...

حلوة موت الاشتغاله الاولى
هادندن بقى واسرح فى البلوج واجيبه من 2006 وانت جاى

محمد فكري يقول...

بديع يا ابو حميد :)
..
نصّ جميل ومحمل بقضية واضحة -دون مباشرة-
..
سعيد إني قرأتلك النهاردة :)

تحياتي

Mr.ProiD يقول...

دنيا اشتغلات يا سدي احمد

بس اكيد عندك حق في كل حرف

سلمت يمناك

تحياتي

Tadwina يقول...

مرحباً / محمد
لقد قام أحد المعجبين بمدونتك بإضافتها إلى تدوينة دوت كوم، بيت المدونات العربية.

قام فريق المحررين بمراجعة مدونتك و تصنيفها و تحرير بياناتها، حتى يتمكن زوار الموقع و محركات البحث من إيجادها و متابعتها.
يمكنك متابعة مدونتك على الرابط التالى:
http://www.tadwina.com/feed/1517

يمكنك متابعة باقى مدونات تدوينة دوت كوم على الرابط التالى:
http://www.tadwina.com

لعمل أى تغييرات فى بيانات مدونتك أو لإقتراح مدونات أخرى لا تتردد فى الإتصال بنا من خلال الموقع ونرجو منك مراسلتنا للأهمية على الايميل
Tadwina@gmail.com
لوضع البانر الخاص بنا على الصفحة الرئيسية لمدونتك حتي يستطيع قراءنا في مصر والوطن العربي من متابعة تدويناتك المستحدثة

و لكم جزيل الشكر،

فريق عمل تدوينة دوت كوم.
http://www.tadwina.com

مدونات منأجل التغير يقول...

تحيتي
هي تناقضات مجتمعنا بكل أشكاله
أدعوك لزيارة تجمعنا مدونات منأجل التغير