الجمعة، يناير 23، 2009

آخرتها شوية أحلام

**************

الليـل .. نـهـار و مكحَّلـينُه

و البـدر ننّـِى جــوه عـينـه

لف النهار .. على كل دار

مالـقاش و لا واحـد يعينـه

* * *

و لأن الليل

مربوط لقلوبنا بعكس الضى

على نيل

بيزيل ف هموم الخلق

بيوسَّع حته للعشاق

و يلم بستره أى فراق

تلقانا بنمسك فيه بايدين و سنان

نغزل أشجانه حصيرة صيف

ان كنا كتار

و ان كنا اتنين

زى العاده

و البرد بياكل ف الجنبين

بكفايه عليَّه لحد الفجر

احكيـلِـك سيره من شخصين

سيف ابن الخيبه

و

ذات البين

الصبح

بيفتح كل عيون الناس

على كل الناس

و تلاقى الفعل ان صرَّح

هدَّاه الرَّعشه

و ده عند العَفى شيَّال الحِمل

اما انا ماقدرش

ماقدرش أضمك وسط الناس

ماقدرش ابعتلك بوستى و سط الناس

ماقدرش أمارس ذنب صغيَّر

مع إن الرب بيغفر

وسط الناس

و ازاى من كبتى

اتقطَّع

حته بحته

و يلموا تحت رجولهم

كل الجته

و انداس

ماقدرش أئن

إلا اما الضلمه تجن

و اخدك و نهج لأبعد شط

نخلع قمصان الهم

و نحضن بعض

و

نفك الكيس

نديلنا م الأحلام بقشيش

لنموت ما نعيش

لليوم الجاى

السبت، يناير 17، 2009

علمت الآن بفوز قصيدتى .. الجزمه راحت ع العلم .. بالجائزة التى يرعاها الفنان خالد الصاوى لأفضل قصيدة لواقعة ضرب بوش بالجزمه و هذا هو لينك جروب المسابقة
http://www.facebook.com/profile.php?id=1366953174#/group.php?gid=19229224797

الاثنين، يناير 12، 2009

مكتوب علينا الشجن

****************

عيل وحيد

ماشى بينظر للبعيد

و القلب شايل حلم يعصى ع الحديد

لكنه محتاج للبشر

ممكن تشوف ف عينيه دموع

أو ضحكه تطلع للقمر

ترصد عليه كل الحالات

الشقي .. الهادي

الحزين .. السعيد

لكنه لما يعنى يسرح

و ده بيحصل كتير

تلقى الشجن ف عينيه بياخدك

لاحتمالات الأماني المستحيله

السكه صعبه

و الظلمه ماتفوتش ليله

باين على قلبك كريم

يا بن السنين الجدبه موت

كدابه و بخيله

مين اللى جابك ف الزمن ده

محملك حلم اللى عدوا مالحقوا حتى يسلموا

مين فهمه

انك هاتقدر

ع اللى قبلك م الرجال

نخوا تحتيه لما ساووا الأرض

و لا يمكن

عنده خبر مانعرفوش

ساعات الفرد بيزل الجيوش

ساعات

بس ده لازم ولد

يجمع خضار كل البلد

ف قلبه و يزمزم عليه

بدباره من عشق الغيطان

و يصاحب الأكوان

يسخَّرهم بنظره من عينيه

مالك كده هايمان يكونش قلبك طب

ما دوقت شاى خلان و لا شكيت الكرب

مالك كده باصص للأرض بالعنيه

تكونش حبيتها و نسيت حاجات تانيه

يا عم يا لايم قلبي هنا مزروع

سيبنى دانا صدرى مافيهش إلا ضلوع

يا عم يا لايم سرى هنا مدفون

يا بدمعى انا أرويه يا افحت و جنبه أكون

أنا الواد الوحيد

المحتاج للبشر

بقيت اشحن بنظراتكم سواعدى

و افحت قنايه تلف غيط الله

سيِّلت دمى ف القنايه بحور

و بكيت .. نزل المطر دمعي

و بقالي اهو

م الزمن سنتين مستني

لمن طرح غيطى

بنادى و صريخى

حرَّك شواوش النخل

و لا رد باب بيتكم

لا قطفت و اديتكم

و لا وديتونى يا خلق

و لا حتى وديتكم

مالكم عنيكم ليه بالواطى مشغوله

عوضى على اللى نشا

جوه العينين الشجن

من تاني و كوانى

و اهو ماشى لسه

عيل وحيد

ماشى بينظر للبعيد

و القلب شايل حلم يعصى ع الحديد

لكنه محتاج للبشر


الثلاثاء، يناير 06، 2009

ناجح ف وسط الفاشلين أحسن من فاشل ف وسط الناجحين

السبت، يناير 03، 2009


الجـزمه راحت ع العَـلَـم

مش كل مـن قال يا وطـن يقدر علـى الأشواق
و لا كـل من بلسـان رَطَن يطلع لليلُـه نـهـار
تسلم إيديك يـا منتظـر كـانت دليـل إثبــات
على إن مـن ظلمـه طِـوِل ممكن ف يوم ينهار
الجزمه طارت زغردت ف الـجـو غاويه جهاد
رايحه تمـارس حـقهـا و تـاخدلنا بـالـتـار
رايحـه على وش اللى طوِّل عـهـد الاستعبـاد
حالفه لَـتـفْـرِح خَلْق .. و تـقيد ف قلبه النـار
آدى اللى كان يا بو الرجـال ف لحظتيـن اتنيـن
لكـن لأن الثـوره فـيه .. عـدى بحور و انهار
وصـل لكل المظـلـومين .. للقلب قبل العيـن
نـاصر ، جيـفارا ، غـاندي بقوا محور الأفكار
تسلم يمينك يا جدع
تسلم شمالك
اللى ناولت لليمين
و تسلم الجزمه اللى تفهم ف السياسه
طارت و راحت ع العلم
محروسه بـ(الله أكبر)

م الناحيتين
يا مُنتظِر يا مُنتظَر ،
ياخونا إيه هيه الحكايه ؟
كل الحكايه
إنه مارس فعل ثورى
طلَّع الحلم المدروخ جوه منى
فوَّقه
حطه قدام ننى عينى
و قال : آهو
و الله ينفع
و الله ممكن
بس ما تخليش ف قلبك
رجفه تسكن
أو تفكر مرتين ،
الجزمه قالت تكْمِـلَه :
ف بلاد ما يحكمهاش عباد
ف بلاد تديرها مؤسسات
الأفعى مش م الراس تموت
لازم تولَّع ف الجسد
و تفش غلَّك م الألم ،
و عشان كده
الجزمه راحت ع العلم