الأحد، مارس 15، 2009

من اشتغالات الزمن ده

الاشتغاله الأولى

****************



مش معقول !!

هايسيبو لسانى يقول

و اشتم و أبرطع على راحتى عرض

و طول

"هاتلف و ترجع على كفى"

زوغان زوغان

"الأرض بحالها ما هتكفى"

ماذا تريد الغندورة التى كانت تطل من شباك المشربية فأصبحت تطل من شباك البى إم؟

انا عايزه اتجوز ميكانيكى

بيشرب م القهوه الساده دى

و مش مهم بيعرف فرق التاء م التى

م التين م الدين

زوغان زوغان

"الأرض بحالها ما هتكفيك

شوف فرق كفى من كفيك"

ع الناصيه واقف واد أصلع شغال سمسار

بيبصلى البصه اياها تلقانى انهار

"انا عايزه اتجوز سمسار"

على ناصية شارع الرقص و الشخلعه

مافيش عوالم م اللى كانوا بيعروا جسمهم و هما متغطين ببعضهم

فيه عربيات خلايجه ركباها بناتنا

و اتَّك على نون النسب

من ذا الذى أكلنا زيت

من ذا الذى شربنا فول

و ام الخلول

من ذا الذى خلانا سوس

من ذا الذى وَقَف البلاد

لوِلد وِلد ولد الولد

"على شوقك جعجع قول

هتلف و ترجع على كفى"

زوغان زوغان

"الأرض بحالها ما هتكفى"

- بقولِك ايه .. تيجى نعمل زى جدى و جدتك و ناكل ترمس و ضره؟

تيجى نعمل زيهم و يبقى أكتر حاجه بنعملها و احنا بنرتجف بوسه؟

تيجى نعمل زيهم و نحب؟

- ناوى تهبب ايه .. سامع .. أرهف السمع فما فى القول اشتغاله

"هتلف و ترجع على كفى

وقت اما أعوز

هاطبق على روحك بخوامسى

هاتفلفص فين

الدنيا بحالها ما هتكفى"

يا راجل

عيب دا الناصر يدى الاشتغاله أهميه و يمسكها ناصية شارع الرقص و الشخلعه و يأدب بيها البُرمجيَّه

"مجعمزُ انت .. و ليس من الأمر مفر

فأنا كمصيدة و انت كفأر

سأعصرك عصرا لو تذكرت أو ذكرت كلمة ثأر"

قال إيه يا عم الحاج

عمال اوزن ف قصايد

و اعمل للصوره مصايد

و اعمل نفسى بحب

طب ازاى و انا قاعد على كف صاحبنا

راكن أوراقى على صابع

و اقلامى على صابع

و خيال حبيبتى على صابع

و شوية حجج على صابع

و بالنسبه للوسطى لامؤاخذه يعنى و غصبن عنى

عشانى

الخميس، مارس 12، 2009

إوعى تتعود ع الفشل .. إوعى تخاف م النجاح

السبت، مارس 07، 2009

لحظتين للروح


الصباح

أحسن حاجه بتولد العصافير

على سلوك الكهربا

و بلكونتنا

من بعد ما تاهت من الأنحاء

ريحة غسيل أمى

مابقتش تاخد زهوها

إلا ف نداوة الصبح

أو ريح الغروب

أطلع

و اشم الأمنيات الممكنه

تشاركنى عصفوره ف سؤال

من غير مانرفع حسِّنا

لنزيح قطرات الندى

عن قلبنا

" ليه ربنا

خَلَق العَرَق؟ "

الخميس، فبراير 26، 2009

موال يا حلوه يا امُ التوب لاسمر

المره دى جايبلكم كنز من كنوز الغُنى الشعبى المصرى الجميل .. موال يا حلوه يا ام التوب لاسمر للفنان الشعبى الجميل الكبير الحاج يوسف شتا .. الموال مكتوب و مسموع من اللينك اللى ف الآخر .. أسيبكوا بقى تستمتعوا
*************************************************

عرفت عينيه الدموع يا منيتى بعدك
والسر بين الضلوع أشكيه لمين بعدك

صبحت مثل الشموع لما الزمان بعدك
***
حاولت أنسى همومى والعذاب أخفيه
وغصب عنى بيجى الشوق يغلبنى
بيضيع منى نصيبى والأمل أخفيه
وصبح عزولى بكلام اللوم يغلبنى
سهم المحبه جرحنى والألم أخفيه
وان جيت أنسى ألاقى الحنين يغلبنى
***
يا عز لاحباب أنا قلبى هوى قلبك
أعيش فى عز وسعاده لو رضى قلبك
قلبى إليك انفتح بقى قلبك
والجنه فى قربك والجحيم بعدك

***

يا حلوه يا امُ التوب الاسمر

و يا امُ الطرحه الحريرى

الوجه سبحان من صوَّر

و زى البدر المنيرِ

ردى عليه شغلتينى

و ناديت و لا كلمتنى

طول الليالى تركتينى

عايش ف وجدى و تفكيرى

الورده إيدك زيناها

و عينيه دولا شايفاها

و عشقها قلبى و هواها

مين يستاهلها .. مين غيرى

غنيتى و عجبنى غاكى

و وقفت سارح وياكى

و الورد داق اللى معاكى

خد من جمالك كتيرِ

يا حلوه يا امُ التوب الاسمر

***

اللينك :

http://www.4shared.com/get/89739250/4ed9f9da/______.html

السبت، فبراير 21، 2009

عدم اكتمال الانفصال

ع المفارق

كنت واقف

بشترى لحظة وداع

يبدو إن الحزن كيف

و اختمار الفرح

كدبه

كل همى

حد يبقى ماشى مِفْرِد

ألتصق به .. و انفصل

يفتح الباب المسوجر

ع الشجن

و انتشى

ألتفت و اديله ضهرى

من سكات

و ابدأ اسمع فى الغناوى

اللى حِكْر على النايات

.............................

.............................

لمَّا اروَّح

هارتخى فوق السرير

و ارسم الحزن

الجميل

بالدموع

ع الحيطان

أبدأ الضم ليل ف ليل

يحلى ليَّه

إنى أرقص ف الضلام

...........................

...........................

بس خوفى لمَّا انام

ربما يجينى

اللى فُتْه بجرح غاير

ع الطريق ,

ربما يسألنى ليه ,

ربما أصحى مدمَّع

و اعرف الحزن بحقيق

أعرف ان اربع مسالك

بشتباكات المغارب و المشارق

مش ضرورى تكون مفارق

ربما

ربما تبقى مجامع

الاثنين، فبراير 09، 2009

العمر لحظه

كان اللى كان و اللى جاى هايكون

ينوبك ايه غير لحظه وسط الكون

تشربها للمنتهى و تسكر على كيفك

عشق و حياه

تنطيط و مزيكا

لو انت عيِّل

تموت ف الجرى

و ف آخرة شارعكوا جدار

أو شاب واقف

ف ميكروباص بيتخبط

كأنه ف زار

لو رب أسره و مربوطه ف رقبته بطون

أو لو عجوز مهجور

عايش كأنه ف غار

إضرب و لاقى

دور ف السواقى

قزقز ساعاتك

جمد ف قلبك

و اوعى تخاف .. إلا

من سيادة ال 111 مابين حاجبيك

على وشك

و ان مره سرسبت الحياه

لعروقك السِم الكئيب

شد الشفايف بالإيدين م الناحيتين

بالعافيه بيِّن الابتسام

العمر لحظه

و البسمه لحظه

شوف عمرنا بيساوى كام

و يساوى كام الانتظار

الجمعة، يناير 23، 2009

آخرتها شوية أحلام

**************

الليـل .. نـهـار و مكحَّلـينُه

و البـدر ننّـِى جــوه عـينـه

لف النهار .. على كل دار

مالـقاش و لا واحـد يعينـه

* * *

و لأن الليل

مربوط لقلوبنا بعكس الضى

على نيل

بيزيل ف هموم الخلق

بيوسَّع حته للعشاق

و يلم بستره أى فراق

تلقانا بنمسك فيه بايدين و سنان

نغزل أشجانه حصيرة صيف

ان كنا كتار

و ان كنا اتنين

زى العاده

و البرد بياكل ف الجنبين

بكفايه عليَّه لحد الفجر

احكيـلِـك سيره من شخصين

سيف ابن الخيبه

و

ذات البين

الصبح

بيفتح كل عيون الناس

على كل الناس

و تلاقى الفعل ان صرَّح

هدَّاه الرَّعشه

و ده عند العَفى شيَّال الحِمل

اما انا ماقدرش

ماقدرش أضمك وسط الناس

ماقدرش ابعتلك بوستى و سط الناس

ماقدرش أمارس ذنب صغيَّر

مع إن الرب بيغفر

وسط الناس

و ازاى من كبتى

اتقطَّع

حته بحته

و يلموا تحت رجولهم

كل الجته

و انداس

ماقدرش أئن

إلا اما الضلمه تجن

و اخدك و نهج لأبعد شط

نخلع قمصان الهم

و نحضن بعض

و

نفك الكيس

نديلنا م الأحلام بقشيش

لنموت ما نعيش

لليوم الجاى