آخرتها شوية أحلام

**************

الليـل .. نـهـار و مكحَّلـينُه

و البـدر ننّـِى جــوه عـينـه

لف النهار .. على كل دار

مالـقاش و لا واحـد يعينـه

* * *

و لأن الليل

مربوط لقلوبنا بعكس الضى

على نيل

بيزيل ف هموم الخلق

بيوسَّع حته للعشاق

و يلم بستره أى فراق

تلقانا بنمسك فيه بايدين و سنان

نغزل أشجانه حصيرة صيف

ان كنا كتار

و ان كنا اتنين

زى العاده

و البرد بياكل ف الجنبين

بكفايه عليَّه لحد الفجر

احكيـلِـك سيره من شخصين

سيف ابن الخيبه

و

ذات البين

الصبح

بيفتح كل عيون الناس

على كل الناس

و تلاقى الفعل ان صرَّح

هدَّاه الرَّعشه

و ده عند العَفى شيَّال الحِمل

اما انا ماقدرش

ماقدرش أضمك وسط الناس

ماقدرش ابعتلك بوستى و سط الناس

ماقدرش أمارس ذنب صغيَّر

مع إن الرب بيغفر

وسط الناس

و ازاى من كبتى

اتقطَّع

حته بحته

و يلموا تحت رجولهم

كل الجته

و انداس

ماقدرش أئن

إلا اما الضلمه تجن

و اخدك و نهج لأبعد شط

نخلع قمصان الهم

و نحضن بعض

و

نفك الكيس

نديلنا م الأحلام بقشيش

لنموت ما نعيش

لليوم الجاى