مكتوب علينا الشجن
****************
عيل وحيد
ماشى بينظر للبعيد
و القلب شايل حلم يعصى ع الحديد
لكنه محتاج للبشر
ممكن تشوف ف عينيه دموع
أو ضحكه تطلع للقمر
ترصد عليه كل الحالات
الشقي .. الهادي
الحزين .. السعيد
لكنه لما يعنى يسرح
و ده بيحصل كتير
تلقى الشجن ف عينيه بياخدك
لاحتمالات الأماني المستحيله
السكه صعبه
و الظلمه ماتفوتش ليله
باين على قلبك كريم
يا بن السنين الجدبه موت
كدابه و بخيله
مين اللى جابك ف الزمن ده
محملك حلم اللى عدوا مالحقوا حتى يسلموا
مين فهمه
انك هاتقدر
ع اللى قبلك م الرجال
نخوا تحتيه لما ساووا الأرض
و لا يمكن
عنده خبر مانعرفوش
ساعات الفرد بيزل الجيوش
ساعات
بس ده لازم ولد
يجمع خضار كل البلد
ف قلبه و يزمزم عليه
بدباره من عشق الغيطان
و يصاحب الأكوان
يسخَّرهم بنظره من عينيه
مالك كده هايمان يكونش قلبك طب
ما دوقت شاى خلان و لا شكيت الكرب
مالك كده باصص للأرض بالعنيه
تكونش حبيتها و نسيت حاجات تانيه
يا عم يا لايم قلبي هنا مزروع
سيبنى دانا صدرى مافيهش إلا ضلوع
يا عم يا لايم سرى هنا مدفون
يا بدمعى انا أرويه يا افحت و جنبه أكون
أنا الواد الوحيد
المحتاج للبشر
بقيت اشحن بنظراتكم سواعدى
و افحت قنايه تلف غيط الله
سيِّلت دمى ف القنايه بحور
و بكيت .. نزل المطر دمعي
و بقالي اهو
م الزمن سنتين مستني
لمن طرح غيطى
بنادى و صريخى
حرَّك شواوش النخل
و لا رد باب بيتكم
لا قطفت و اديتكم
و لا وديتونى يا خلق
و لا حتى وديتكم
مالكم عنيكم ليه بالواطى مشغوله
عوضى على اللى نشا
جوه العينين الشجن
من تاني و كوانى
و اهو ماشى لسه
عيل وحيد
ماشى بينظر للبعيد
و القلب شايل حلم يعصى ع الحديد
لكنه محتاج للبشر
هناك 6 تعليقات:
السلام عليكم
انا اول مره ازور مدونتك وبقالى هنا اكتر من نص ساعه
ميرسى بجد لكل كلمه قريتها هنا وافادتنى او فكرتنى بمعانى كتير بننساها فى وسط زحمه الحياه
واتمنى انك تقبل زيارتى تانى
شكرا ليك
و عليكم السلااااام و رحمة الله و بركاته
زيارتك شرفتنى و أسعدتنى جدا و خصوصا لأن شعرى قدر ياخد بعض من وقتك
أنا اللى عايز أقولك مرسى على الكلام الجميل ده أما بالنسبه للزيارات الجايه فبلبلدى كده على دماغنا
"والقلب شايل حلم يعصى ع الحديد
لكنه محتاج للبشر"
كلمات جميلة وأسلوب بسيط وجميل فعلا..
بحس لما أدخل مدونتك بجو السيدة زينب،الحسيني،الفجالة ،عابدين....إلخ
الاماكن الشعبية الجميلة واهلها الطيبين..الحياة الجميلة إلي نادر لما نلاقيها دلوقتي....
موفق يا رسول الزمن الجميل...
ربنا يكرمك يارسام يا واقعى
و شى الله يا ست
تحفة يا ابو الفتووووح رااااااااااائعه
.
.
.
.
انت عبقري شعر يابني
ربنا يخليك يا آدم يا كبييييير
إرسال تعليق