العمر لحظه
كان اللى كان و اللى جاى هايكون
ينوبك ايه غير لحظه وسط الكون
تشربها للمنتهى و تسكر على كيفك
عشق و حياه
تنطيط و مزيكا
لو انت عيِّل
تموت ف الجرى
و ف آخرة شارعكوا جدار
أو شاب واقف
ف ميكروباص بيتخبط
كأنه ف زار
لو رب أسره و مربوطه ف رقبته بطون
أو لو عجوز مهجور
عايش كأنه ف غار
إضرب و لاقى
دور ف السواقى
قزقز ساعاتك
جمد ف قلبك
و اوعى تخاف .. إلا
من سيادة ال 111 مابين حاجبيك
على وشك
و ان مره سرسبت الحياه
لعروقك السِم الكئيب
شد الشفايف بالإيدين م الناحيتين
بالعافيه بيِّن الابتسام
العمر لحظه
و البسمه لحظه
شوف عمرنا بيساوى كام
و يساوى كام الانتظار
هناك 6 تعليقات:
حلوة القصيدة
بالتوفيق دايما
ربنا يخليك
السلام عليكم و رحمة الله
أولا : بجد شرفتنى بالزيارة
و يارب مش تكون الاخيرة
ثانيا : بجد القصيدة أكثر من رائعة
كان اللى كان و اللى جاى هايكون*
فعلا .. يبئا ليه نزعل مادام القدر مكتوب؟؟!!..
و اوعى تخاف .. إلا
من سيادة ال 111 مابين حاجبيك
على وشك*
صح .. لأن فعلا ماحدش يقدر يزعلك إلا إذا كنت اللى فيك القابلية لدا
و ان مره سرسبت الحياه
لعروقك السِم الكئيب
شد الشفايف بالإيدين م الناحيتين
بالعافيه بيِّن الابتسام*
بجد رااااااااائعة رائعة بجد
شوف عمرنا بيساوى كام
و يساوى كام الانتظار*
الحياة فرصة واحدة
ياما نعيشها صح و نستمتع بكل لحظة فيها
ياما نعتزلها و نكرهها بكل خطويها
و مدام القدر مكتوب
و اللى فالكتاب هيكون
يبئا عيشها صح
تكسب أعظم مافى الكون
واللى هو طبعا راحتك
و ابتسامتك
دمت بود
حلو الكلام لكن التنفيذ صعب يا محمد احيانا بندور فى ساقية الحياة واحنا ماليانين حزن مستنين شمس بسمة تيجى من بعيد وعمرنا كله يروح فى الانتظار
كلمات جميلة لكن هيهات ان تنفذ
دمت بخير ومودة
soul whisper
و عليكم السلام و رحمة الله و بركاته
الله يشرف مقدارك :) و طبعا مش هاتكون الأخيره و شكرا جدا على رأيك فى القصيدة
جسر الحياة
أولا .. شكرا جدا على زيارتك
ثانيا .. هو احنا ليه نستنى البسمة تجيلنا ، هو حد تانى اللى هايبتسم ، يعنى البسمه من جوانا و دوامة الدنيا دى بتلف بتلف بينا من غيرنا بتلف بنعيط بنضحك بتلف أما الحزن ده بقى فأغبى حاجه ف الدنيا .. أنا اللى بحبه بجد هو الشجن .. الحاله دى اللى بتحسيها و انتى بتسمعى عبد الوهاب مثلا
و الحكايه أصلا مش مستاهله دول كلهم يومين و ماشيين
:)
ع الجنه ان شاء الله
دعوة جميلة للتفاؤل والبسمة ..رغم كل الضغوط والهموم ...أنا لتوى لسه معلق عند واحد أسمه TIMMY مقترحا عليه وضع زرجينة على فم كل مكتئب تفعل آليا ما تقترحه أنت بشد الفم من جانبيه لصنع البسمة ....يظهر انى وصلت لمكان حازوره دايما تحية أخرى لأبو الفتوح الجانبية الوجهية
إرسال تعليق