السبت، فبراير 21، 2009

عدم اكتمال الانفصال

ع المفارق

كنت واقف

بشترى لحظة وداع

يبدو إن الحزن كيف

و اختمار الفرح

كدبه

كل همى

حد يبقى ماشى مِفْرِد

ألتصق به .. و انفصل

يفتح الباب المسوجر

ع الشجن

و انتشى

ألتفت و اديله ضهرى

من سكات

و ابدأ اسمع فى الغناوى

اللى حِكْر على النايات

.............................

.............................

لمَّا اروَّح

هارتخى فوق السرير

و ارسم الحزن

الجميل

بالدموع

ع الحيطان

أبدأ الضم ليل ف ليل

يحلى ليَّه

إنى أرقص ف الضلام

...........................

...........................

بس خوفى لمَّا انام

ربما يجينى

اللى فُتْه بجرح غاير

ع الطريق ,

ربما يسألنى ليه ,

ربما أصحى مدمَّع

و اعرف الحزن بحقيق

أعرف ان اربع مسالك

بشتباكات المغارب و المشارق

مش ضرورى تكون مفارق

ربما

ربما تبقى مجامع

هناك 11 تعليقًا:

Amgad يقول...

حبيب هارتي
عاجبني اوي تدرج الحالة في القصيدة
رغم اختلافي معاك في الفلسفة
الاول كنت منتشي ومنتعش بعدين رجعت حزين بعدين خفت
بجد الجزء الاولاني تحفة اخر حاجه
وخليك منتعش يمكن تلاقي حد يفتح الموسوجر
ههههههههههههههههههههههههههه
وعلي راي الاغنية
الكل منتعش والكل منتشي
الله علي الحياة بقي لونها شفتشي
احلي مسي يا محمد

جسر الى الحياة يقول...

واذا ملقيتش حد يفتح المسوجر ولقيت حد يقفل عليك كمان وكمان بست سكات هتعمل ايه
حالة متنوعة داخل كيان واحد شىء مذهل

دمت مبدع

محمد أبو الفتوح يقول...

أمجد
يا سلام عليك انت يا بو دماغ عاليه
أحلى مسا و صباح
و اللى راح راح
على رأى الغنوه
ههههههههههههههههههههه
جسر الى الحياة
زى مانتى قلتى حالة متنوعه _ و طبعا شكرا جدا على شىء مزهل دى _ يعنى انا لو مالقيتش اللى يفتح المسوجر هابقى متضايق و شيطانى عمال يقولى مش هاينفع كده حياتك فاضيه و جوك راكد بس الملاك هايقولى كده أحسن ماتفوت حد بجرح غاير ع الطريق
شكرا جدا لاهتمامك

جسر الى الحياة يقول...

محمد مهما حاولنا نهرب من الحب هو هيلاقينا هيلاقينا حتى لو اتجرحنا ده من عذابات الحب بمعنى العذب والعذاب

دمت مبدع وادام الله عليك احساسك

admelmasry يقول...

راااااااااااااااااائعه

محمد أبو الفتوح يقول...

جسر إلى الحياة
بس الإنسان ف الأول ممكن يعرف يتحكم ف نفسه عشان زى مابيقولوا الدكاتره " دى أرواح ناس "
آدم
حبيييييييييييب قلبى
ربنا يخليك و يديم المحبه

maxbeta3zaman يقول...

شعرك له جرس جميل يا أبو الفتوح وكذا المعانى والمشاعر التى بداخله ...عرفت المدونة من البرنامج الإذاعى أنت تسأل وكنت لتوى قد كتبت أننى ممن يستهوينى الشعر ..وأنا سعيد لتعرفى على مدونة تدل على موهبة شعرية واضحة ..وسأتجول فيما سبق للتعرف على قصائد أخرى
تحياتى

رندا يقول...

لا اعلم كيف احسست وشعرت ان قلمكـ كثيرا من احمد فؤاد نجم وكانك تغزل الكلمات باصابع لها عمق خاص جداً نادرة جداً
الان ... سوف امشى بهدوء كلماتك
والان ...يشعر نبضى ضربات قلبى
والان ...ايضاً سوف اتصفح باقى المدونة

تحياتى وتقديرى

ساعه الغروب يقول...

دى مش اول مره اجى وكل مره ماكنتش بلاقى بجد كلام اقدر اعلق بيه

بس المره دى قلت لا لازم تقولى

فبجد بجد حلوه اوووووى الوووووووى الكلمات

انا قريتها اكتر من 3 مرات من كتر ما الكلمات شدتنى


ميرسى بجد لانى بقالى فتره مش قريت حاجه قويه كدا

والحلو هنا بجد انك قلت كلام له معنى اوووووى بطريقه بسييييطه اوى

شكرا تانى

وميرسى على زياراتك لمدونتى التواضعه
:)

سلام

محمد أبو الفتوح يقول...

ماكس بتاع زمان
أنا اللى سعيد أكتر برأيك في شعرى و سعيد أكتر بإنك هاتدور فى اللى فات .. دى حاجه تنم عن ذائقه شعرية عالية
رندا
ربنا يكرمك على الكلام الحلو ده
ساعة الغروب
كلامك طير قلبى من الفرحة لأن موضوع العمق و البساطه ده هو غايتى و الحمد لله إنى قدرت أحقق و لو جزء بسيط منه .. طبعا أنا اللى مش لاقى كلام أقوله على كلامك الجميل .. أخجلتنى

غير معرف يقول...

محمد ياشاعر .. تحياتي
أول مرة تقريبا أقرأ لك عامية!!
مازلت أذكر نصوصك الفصحى وأنا أحتشد لها بحواسي أمام شاعر شاعر بدون حكم قيمة.. شاعر !!
وأنت الآن تؤكد أن الشعر هو الشعر بكل وسائل التعبير سيصل لي كمتلقلي لأنه بكل بساطة حضور خاص مع الذات وليس حضورا اجتماعيا..
عاميتك هي فصحاك!! حالة من الوجد والحس المرهف أمام تجارب الحياة
نص عدم اكتمال الانفصال معادل فني يتميز بالصد لحالة الغربة داخل الوطن
بتراكيب لغوية منحوتة بتعب وجدية بعدا عما هو سياق جمعي في نص العامية
لا أعرف لما لاتبذل نفس الجهد في نحت عناوين القصائد؟؟ ربما لك تعمدك في ذلك وربما تفكر في إدراك ذلك..
عموما أتمنى أن تسعدني بتواصلك واعذرني فأنا خارج مصر والوقت ضيق وانت تستحق المزيد من الوقت والمزيد من القراءة
لكن المحبة لشخصك تنمو في جميع الأحوال..