البيبان
......
يا نقى البلح الرطب المريمى لاسقيك من عينى على عينى
ما شافش ضلّك مسيح لكنه شاف عينى
(تراب بلدى) مشى عليه عينى
(عيسى النّبى) كاتب على جبينى
يا ابن إبراهيم و اسماعيل و محمد الخاتم دينك على دينى
......................
بانى مبانى و ليها بيبان
من منف لمّا القاهره
منها اللى بان و اللى اتنسى
مين قال كذا و مين قال كذا؟
و مين صوته وصلّى
أخد منه و اصلّى
و بيبانه مترسه
بيبانه من زمن
معموله من الزمن
قبل الممات و قال
حبايبى فى الفتن
هيناموا و يقعدوا
و يسيبوا و يكبتوا
دا نصيب مَن قَد نسى
* * *
فيه باب تقولشى طبيب
أحزن.. لعنيه يطيب
على كتفى يجيب طباطيب
و زخارفه شاى بحليب
على قهوه ف حى حسين
نقاريش متنقرشه
* * *
و فيه باب سهل المُحيّا
سبعات فى تمنيات
أسوان بتنادى عليا
" أبوك السّاقا مات
أبوك البنّا وين؟
قواليبنا معطشه "
* * *
و فى باب خشب الشجر
ع النيل لما إنحدر
يسأل عما بدر
من عمده خدنا بر
بره مالوش رجلين
الخيشه م الخِشَه
* * *
و فى باب معدن غبى
يعكسلى مطلبى
الذُل طَالَ بى
قُلتُ " يا سيدنا النبى "
قالى نبيكوا فين؟
نبينا فى الحِشا
نبينا فى الحِشا
هناك 11 تعليقًا:
انا اول حد يكتب كومينت :))
المهم
الجميل انها محسساني بالحكواتي،، يعني دخلة مترابطة ومش مترابطة باللي بعدها
علي فكرة هما احلي سطور في الحكاية كلها
عارف اتمنيت اية وانا باكمل قراية
اتمنيت القي ( مربع ) معرفش لية فكرتني بالمربعات.. انت بتعمل نص المربع وانا باكملة :)
و مين صوته وصلّى
أخد منه و اصلّى
دي مافهاش كلام يتقال ،،، طباطيب ومنقرشة !! حكواتي
عارفه أنا نفسى لو إن الزمان يرجع شويه و أكون راوى شعبى بربابه و الناس تقول لى " إحكيلنا يا شاعر "
أحلى حاجه للشاعر التواصل المباشر مع الناس العاديه عارفه ليه؟
علشان ساعات الثقافه و خصوصا النقد الأدبى بيفسد على المستمع الإحساس البكر للكلام
أنا فرحت قوى إنك بتكملى المربع معايا
و على فكره أنا بعمل الجزء التانى من المهره أم قرن واحد
متشكر جدا إنك متابعانى كده
و أحلى سلااااااااااام
دعاء غريب
ربنا يخليكى
جامده القصيده تعرف انا حسيت فيك حس فؤاد حداد
اسف لو بتزعل من التشبيهات
لكن افكارك وافكارة قريبة .. واسلوبك جميل .. تعرف حسيت انك واخدني في سرداب غويط بقولي البلد هناك اهيه
ما حدش بيشوفها من هنا
وبيقولي كمان اني
اول واحد اشوف البلد من هنا .. بجد انا اول مرة اشوفها كده
شعر رائع يعبر عن عمق في الفكر، من أجمل المدونات التي زرتها
تحياتي
في برنامج زمان كنت بسمعه في الراديو اسمه قالي لي الفيلسوف
انت عامل زي المسحراتي بتاع زمان
واسلوب جامد اوي اوي
انا قولتلك هنبقي صحاب اوي يا محمد
طبعا عندك خط واضح و جميل ... و سيبك م الواد ادم بتاع فؤاد حداد ده ... اصل اده كل لما يقرا حاجة حتي لو فصحي يقولك فؤاد حداد..هههههههه
المهم بجد انا عجبتني القصيده دي جدا
بص يا بو الفتوح انا هاوريك حاجة لانك شكلك هاتقدر وكمان لاني مش هاعرف اعلق على الدرر دي
إحكي يا حكاواتي
وإقرا كتاباتي
وإكتب معاناتي
زحمة ولا يوم الحشر
.............................................
إكتب لأولادي
إكتب لأحفادي
أرض أجدادي
منعوا فيها النشر
.............................................
كتمت آهاتي
نغمة آناتي
سكيت على بناتي
إتعلموا الفشر
............................................
أبويا بقى دادي
وبالحيلة بندادي
وبلعب فالنادي
قولي مين راح يبني مصر
.............................................
آيس كريم دا إيه
ملعون أبو الكريم شانتيه
بياكلوا البندق يا بيه
وع الغلابة بيرموا القشر
.............................................
لا عمرك ها تهنا فيوم
ولا عينك تشوف النوم
طول ما وراك محروم
نايم يا ناس ع الحصر
.............................................
وبعدين بقي هامشي ادور عليكم في البلوجز
مختفيين لية انت وهيثم ؟ قولوا اي حاجة علشان انا باقلق بسرعة
آدم المصرى
حبيبى :)
لأ مابزعلش و الله فؤاد حداد ده أبويا
و هو فيه فيه حد بيزعل لما يتشبه بأبوه
مبسوط قوى إن الإحساس ده وصل لك
هى البلد كده محندقه و بيبانها مشرّقه على قلوبنا
يسرا
ربنا يخليكى ، ولا عمق تفكير ولا حاجه داحنا غلابه بنعرف نحس بس
محمد مفيد
أبو عبد الله إزيك؟
عارفه لما فكرتنى بيه الشجن هز جسمى و أنا بفتكر نبرة قااااااال لى الفليسوف
ربنا يخليك و تفكرنى
cortx
إحنا صحاب خلاص يا صاحبى
على فكره بجد فؤاد حداد كتب فصى كتييير
و فصحى مش قليله لأ عاليه قوى
ربنا يخليك على الإطراء، إدعيلى فى التراويح
المزاجنجى
زجل جميل يا مزاجنجى و فكرة القفل على كل تلات بيوت ببيت رابع من قافيه و وزن تانى حلوه بس ياعنى كان فيه حتت قليله ماعجبتنيش و كانت سهله قوى فى الكتابه و مافيهاش مخاض الجديد
شكرا ليك و مستنيك
sasooooooooo
ماتقلقيش خالص إحنا زى القرود و بعدين إيه ده فيه حد بيقلق عليا أزغرد طبعا بعد هيثم
كل الحكايه إن الدراسه جت و أنا عندى حكايه طويله كده معاها فمقلق و برجع تعبان و بنام ده غير إن أنا زهقت من قعدتى فى وش الحيطه فى البيت و فى السيبر نفسى أشم هوا و أشوف النيل
على العموم متأسف على التأخير
قصدى أنا و هيثم يااااااااعنى
:) و إيه؟
و أحلى سلاااااااااااااام
والله العظيم انا علقت لك قبل ما اشوف ردك هنا على كلامي بس انا عاوز اعرف معنى كلامك ابن افصح بس ياعنى إيه ؟؟؟
كان فيه حتت قليله ماعجبتنيش و كانت سهله قوى فى الكتابه و مافيهاش مخاض الجديد
شكرا ليك انت عاوز مخاض جديد ازاي قصدك زي الشرق الاوسط الجديد ؟
إرسال تعليق