هيثم صديقى اللى عرفته من سنتين و كأنى عرفته من و انا ف بطن امى
هيثم اللى خرجنى من حته كده مالهاش لزمه فى الدنيا و فتح لى أبواب الأمل
هيثم اللى لحن لى خمس أغانى و كأنهم خمس وردات فى عمرى
هيثم اللى قاعد جنبى دلوقتى و مش بخليه يقرا البوست ده عشان مايتكسفش من كلامى عليه
هيثم عنده حفله فى ساقية الصاوى لأول مره و مش الأخيره بإذن الله يوم 23-12-2006
الساعه 8 مساءا
ملحوظه : شكرا لحبايبنا ساسو و مورو و مورجن و آدم .. بحبكوا قوى

الصبر ف قرار المدينه
*************

حكواتى .. صحيح حكواتى.. و مهرج راسم نجماتى..على وشى و زارع تفاحه.. ف مناخيرى و صوتى دا شاعر بربابه.. إدعوا له يحكى و يواتى

حكواتى صحيح حكواتى

ياللى سارحه م الصباح للمغربيه .. مين دليلك؟ مين موريلك سبيلك؟ .. مين إمام؟

و انتى يا أحلى صبيه .. بين وشوش الناس لقيه .. بدر ساب المشربيه

ماشى يسحر .. ف الزحام

ميت غفير يمكن شويه يحرسوا بدر التمام

و لا ليه هايحرسوكى و كل الناس امك أبوكى اختك أخوكى

كل الناس قرايبك إنتى .. و إنتى ما تبغى المحارم

عينك الهاديه تدوَّر .. ع الولا أبو جلد أسمر .. اللى من آآآآخر بلادك

ع الولا اللى حَلالك أو تريدى يكون حَلالك

يوم يجر اليومِ لما مشيك الهادى حِلى لك

يمكن جى ف إيده طينه

أو جى راكب فوق سفينه

أو غرقان ف جراحه راقد لسه ف قرار المدينه

***

أنا الولا أبو جلد أسمر

أنا اللى اقول الحق دايما مهما مرَّر

أنا اللى أمهُر نور عيونى بالمشاعر و اللى أمهَر

من ألف شاعر و اللى لافف و اللى داير

و الرمل عمره ما كان حراير

شب الوليد على ضحك سنى .. مات العدو من غرس سنى .. لكنى وحدى .. ما عدت قادر

دا عدوِّى ميت ..عدوِّى دوِّد.. الدود طِلِع لى عدو تانى

و آدينى نايم ف جراحى جوه قرار مدينه ما بتستحى

ما عدت أملُك غير بس صوتى

و الصبر .. الصبر نور

الصبر نور

يا عايشين ف الدوْر

يا مفرقين الأمل

على حيطان الدوُر

و كأنه ما يلزمش

و كأنه لسه ما نامش

لكنكم عارفين

صبح الموات بالدور

عمارة الحزن برج

دور وراه أدوار

أدوار وراها دور

ع السطح واقف شىء

بيمص منى الروح

بيمصها بشويش .. كل السكك مابتستحيش .. و انا بدى سكه.. عشان اعيش

أول ما لاقيها هاجيلك .. و أقييدلك كللللللللل قناديلك .. و تستَِريح الرجول العفيه

اللى سارحه م الصباح

للمغربيه

ما تتحججش

********

)1(

ما بين الهوا الدافى الميت جوه البيت

و الهوا البارد اللى شايل رعشة جلد الحياه بره

يدوب جدار

جدار بناه راجل من (ميت الكراما) و تقريبا كان زعلان

و تقريبا برده ما كانش لاقى حد مش زعلان عشان يبوح له

فباح بزعله للمونه .. طلع الجدار

عازل

)2(

باب البلكونه دايما عامل تمانيه

وشَّها بره

و راسها ف راسى

حاسس بإشتياق الهوا البارد لمخاض وقوف الشعر على جلدى

الخوف مش من وقوف الشعر

الخوف من إنه يعمل نفسه بيقف

)3(

شرايط .. قزازة ميه نص ممليه ..ورق مش طايق بعضه .. مشبك .. شمعه .. نواية بلحه .. شريط كوجينتول و شريط آبكس

مكتب و لا القاهره الأيام دى

الهوا فوق المكتب

ماهوش بارد و لا تقدر تقول عليه دافى

الهوا فوق المكتب ملعون

فرفور ميرى

********

فرفور الفرافير الميرى

كلِّى ضميرى

و إتمشى يرقَّص ف حواجبه

و دا أكل و مرعى و قلت صنعه

و رايح جاى .. رايح جاى

خلى الننى جوا عيونى

بندول ساعه ماعرفش إزاى

لعب الآتى ف عب الحالى

راح خَنقه ف اللفه قبالى

منظر من روعته أوحالى

أفقع نفسى بلطه ف قلبى

جيت اضرب صدرى ف شماله

مالقتهوش

جيت اضرب صدرى ف يمينه

مالقتهوش

جانى الصوت من ضهرى يقولِّى

حوش يا عم ف قلبك حوش

إتنتور ع الأرض الطاهره

و نتر منه ست وشوش

* * *

صرصار الليل الزنان

و الحربايه ام الألوان

و السحليه و القنفود

جاتهم قرفه

راحت غارفه

من لسانتهم جمله غريبه بصوت حشراتى

" يلعن أبو صنف الإنسان

الزنان ابو الألوان

المتسحلل

المتقنفد جوه عبايته فاهمه الدور"

* * *

فرفور الفرافير الميرى

قرقض حبلى

جيت أنطق

راح ناطق قبلى

جيت أمشى

سحب الأسفلت

و اما وقفت

قطعلى رجلى

مفتتح
****
نجمه وحيده
بتفكرنى بحلم معدى
من ست سنين
كانت عينى بتشبه ليها
لما الوتر الخامس
لعود الروح ما طاوعشى
ضربت ريشتى
و قام مقطوع
صاحِبت سواد حواليها
* * *
القصيده
*****
و إنتى مالك يا زمالك حلوه ليه؟
الخطوه فيكى دو و رى
بتقولى واو .. و تقولى نون.. و تقولى سين
ساكنه الأخيره .. السابقين مفتوحين
اللمه مش لايمه عليه الزغلله
و انا عينى دارت م الشمال لليمين
لفوق لتحت
فاتح مسام الروح لنسمات الهوا
شالك ممالك صوف على الكتفين
ياللى إنتى حُبك فرض و عين
على كل من جاكى يجرى
و كل من سكنك يومين
و ارجع و اقول إن الأصول ماتزيدش عن كونها الأصول
و المستجد مابيد حد يغيره غير اللى نابت م الأصول
الدنيا ساحة معركه و انا الفارس أجول و اصول
باحاسب التاكسى
و اطفى النار على كوسة رئيس القسم
و ازوّد على جلدى راقات من غدر الصحاب و وفائهم
دا ألف عام شقا و لا قرصة ضعف شايله السم
حيرتنى يا شعر بين إلهام و بين تركيب فى الكراكيب
تبان زعلان من بعضك لكين مشتاق
أنا قلبى فاق
أنا قلبى راق
أنا قلبى داخل جوه سباق
و الشاطر اللى هايخسر

بمووووووووووووووت فيهم

بحبكم

****

بصوا بقى

من غير ما الف و ادور

و ازوق ف الكلام

و أقعد أركب ف الصور

بحبكم

حين شفتكم

دخلتوا قلبى دا كده

و لما كان الشعر واخد سكته

من قلبى جاى على قلبكم

راسم نفسه فوق وشوشكم ف إبتسامه

و لا نظرة عين حنونه مُدهَشه

كنت حاسس بيكوا أهلى

أهلى جدا

أهلى خالص

بتجمعوا متفردى

و تلملموا متبعترى

الحضن واسع و انا

واقف جوه ف وسطكم

و كأنكم

جلابيه صوف إنجليزى معتبر

و لا ليه؟

جلابيه صوف م المحله معتبر

و الدفا من كتره

عايز كنت أقولها ف وشكم

بحبكم

بس الخجل

آآآآآآآآآآآآه م الخجل

عيل بيلعب جوه دمى من زمن

و عامله ضُليله و سكن

كان نفسى جدا أفطمه

مع أول بوسه بين رجلى و بين تراب القاهره

لكنه كان عيل شقى

و باس معايا القاهره فصاحبته

و قبل ما ياخدنى الكلام عنه و عنها

و الشوارع و الجوامع

و الميدان و المجمع

و البيارق و الضريح

و الكهارب اللى عماله تمدح بالفصيح

لازم أقولها بالصريح

بحبكم

هاتسمعوها مجلجله مع صوت أدان السيده

و لما واد بصوت مسرسع وسط زحمة البشر جوه الميدان

ينطلق

" و النبى .. حاجه لله و النبى"

و تجبروا بخاطره

فجأه ينفرد

يبقى أنا

و اقولكم

بتحبنا -

بحبكم =

جيت عندنا -

شايل لكم =

شايل لنا ؟ -

قلبى البرىء =

حر و طليق

و لا حوجه لبلوجه و لا

لدوت .. كوم

يدق تانى

******

يا دى الولد

يا بو القلب أخضر

و العيون بلد

من زمان كان نفسى اشوفك

أسمع ف صوتك

و أشوف بشوفك

تسقينى روحى من بين كفوفك

أطرح و انبت أحلام كتير

عيونى تلمع

و قلبى يرجع

يدق تانى

الجنون كما أراه

_______

جَنَّ أى إستتر أو أظلم، جُنَّ جنونا و جنه و مجنه أى زال عقله أو فسد فهو مجنون و الجمع مجانين

هذا من الناحيه اللغويه أما من الناحيه الدلاليه فأجد فى ذهنى مدلولين لكلمة الجنون : حقبقى و مجازى

أما الحقيقى

فيطلقه الناس على المصابين بأمراض عصبيه أو نفسيه و لكن لا يوجد حقيقة أى مرض نفسى أو عصبى يسمى الجنون فلماذا إعتاد الناس على إستخدام تللك الكلمه؟

أرى أنه لما كانت الأمراض موجوده قبل العلم و قبل إطلاق الأسماء العلميه عليها كان من اللازم أن يكون لها إسم ما و لما كانت كلها تشترك فى شىء أساسى واحد و هو أن يصير المصاب غير طبيعيا غير مسؤلا و المسؤليه مناطها العقل فيصبح مجنونا. وأرى أيضا أن الأسماء العلميه لم تستطع أن تحل محل كلمة مجنون لأنها أولا : غير عربيه و تعريباتها معقده مثل : schizophrania الفصام , mania الهوس , paranoia الرُهاب , depression الإكتئاب

ثانيا: تستلزم التفريق بين الأعراض من مرض لآخر و هو ما يكلف العامه ما لا يطيقون

و أما المجازى

فيطلقه الناس على طائفتين من البشر : الفنانين و الغاضبين ؛ فعندما يتملك شيطان الغضب من الإنسان يصبح مجنونا ؛ لا يدرى ماذا يفعل و لا يملك أدنى سيطرة على نفسه -إلا من رحم ربى- ويصير تغلب الإنسان على شيطانه حال الغضب من أكبر تحديات حياته ، و الأحاديث الشريفه التى توضح مكانة القادر على أن يملك نفسه عند الغضب كثيره ، و جنون الفنانين ذلك الجنون المحبب الذى أعتبره أنا شىء طبيعى تماما يتمثل فى الحريه،فما أن يرغب الفنان فى شىء ما - مشروطا بكونه حلالا فى رأى_ حتى يفعله مهما كان غريبا ، ولا يجد الفنان طعما للحياة من دون هذا الإكتشاف المتجدد للأشياء ، و إنى أرى أن إختزال حرية الإنسان المبدع التى كفلها له الله و لم يمنعها قط فى لفظة الجنون نتج عن عصور الإستبداد و القهر التى عاشها و يعيشها هذا الشعب على كافة المستويات من الحاكم إلى الأب و إعتياده عليها حتى صارت جزءا من حياته اليوميه الممله - تلك الدائرة المغلقة عديمة اللون - فصار قدرا بسيطا من ممارسة الإنسان لحريته جنون ، و من الناحية الأخرى فرح المبدعون كثيرا بهذه الكلمه لبحثهم المستمر عن التميز و التفرد و الإختلاف و لو تأنوا قليلا لوجدوا أنها تضرب فى أساس حريتهم و تجعلها شيئا منبوذا - و هى البريئة تماما من ذلك - من الناس إذ أنه ليس على المجنون حرج و الفنان المجنون فى مخيلتهم يزنى و يشرب الخمر و من الممكن جدا أن يكون شاذا

نتيجة لشيوع ذلك المفهوم عن الإبداع ، نسب كثيرون أنفسهم لحركة الفن فقط لنيل تلك الحريه غير المشروطه. فتجد الشاب أو الشابه الذى لا زال يتعلم العَرُوض أو أبجديات القَص أو طريقة التحرك على المسرح منغمسا فى الحشيش و الليالى البمبى و يقرأ عن التشظى و العبثيه و كأنه وُلد فى فرنسا و لم يولد على يدين سمراوين لداية عجوز ، و كأنه شب على مشهد برج إيفيل و لم ينمو مُكحلا بمشهد الحسين و خان الخليلى ، و كأن تلك الأذن التى شربت المسحراتى و عد صوابعك كام خنصر بنصر وسطى سبابه إبهام و جرس الفسحه ضرب ضرب ، تربت على أنغام توينكل توينكل ليتل ستار

و إيييييييييييييييييييييه؟؟؟

و أحلى سلاااااااااااااااااااااااااااااااااااااام بقه :)

عيل كبير السن

*********

لمّا الصغير يكبر

و يعدى سور ورا سور

و الناس بتتفرَّج

مابين ناكر و بين مبهور

تتشقق السموات و تندَّع الميه

تتفتح الشماسى فى الرايحه و الجايه

و هو ماشى شايل أحلامه شمسيه

يسمع كلام الناس من ودن دواره

و يخرجه ع الورق عرق الفواعليه

كان ياما كان من زمن عيل كبير السن

لا عمره لعب الحجله و لا غيرشى سن

و لا كانش دارى إنه أيامه فيه بتسن

نَفَس العيال

********

عين السما م الأرض

عيله و طايشه

و البدر قال للزرع يا بختك

نزل الندى من هنا

غفّل على خدك

لولاش الدنيا هتعتم

لكنت ابات عندك

شوف العيون قاصر

سته على ستين

ما تجوز الحكمه ع الصغير

ولا حتى بالتسنين

اللعب نَفَس العيال

و السما بنوته شعرها مضفر

البدر ده التوكه

__________

على فكره هيثم لحنها يا كماعه:) و حلوه قوى قوى

البيبان

......

يا نقى البلح الرطب المريمى لاسقيك من عينى على عينى

ما شافش ضلّك مسيح لكنه شاف عينى

(تراب بلدى) مشى عليه عينى

(عيسى النّبى) كاتب على جبينى

يا ابن إبراهيم و اسماعيل و محمد الخاتم دينك على دينى

......................

بانى مبانى و ليها بيبان

من منف لمّا القاهره

منها اللى بان و اللى اتنسى

مين قال كذا و مين قال كذا؟

و مين صوته وصلّى

أخد منه و اصلّى

و بيبانه مترسه

بيبانه من زمن

معموله من الزمن

قبل الممات و قال

حبايبى فى الفتن

هيناموا و يقعدوا

و يسيبوا و يكبتوا

دا نصيب مَن قَد نسى

* * *

فيه باب تقولشى طبيب

أحزن.. لعنيه يطيب

على كتفى يجيب طباطيب

و زخارفه شاى بحليب

على قهوه ف حى حسين

نقاريش متنقرشه

* * *

و فيه باب سهل المُحيّا

سبعات فى تمنيات

أسوان بتنادى عليا

" أبوك السّاقا مات

أبوك البنّا وين؟

قواليبنا معطشه "

* * *

و فى باب خشب الشجر

ع النيل لما إنحدر

يسأل عما بدر

من عمده خدنا بر

بره مالوش رجلين

الخيشه م الخِشَه

* * *

و فى باب معدن غبى

يعكسلى مطلبى

الذُل طَالَ بى

قُلتُ " يا سيدنا النبى "

قالى نبيكوا فين؟

نبينا فى الحِشا

نبينا فى الحِشا

نيّه من رياح و نسيم

....................

شَدّوا القيد على زِندى و قالوا يلاّ ارقص

إرقص و ورينا

و خدها رقص رايح جاى

م الصحرا للمينا

دوق من ملح الصحارى و ملح البحر

و ملح الدمع من عينك

لقيت الصحرا بتغنى بواحاتها

و البحر...بيغنى بالنورس

حتى الدمعه من عينى

نازله تغنى لبسمه جايه فى السكه

سكك سالكه

و ماشيه تمد بالتساهيل

ترابها يبارك الخطوه و يبقى ع الأثر زينه

تشيل سنينى منى حتت سودا

و تبدر الأبيض على جبينى

تنبّت المزيكا أحلامى

يأسرنى إيقاع الكلام و الإلهام يدينى

على قد نيه من رياح و نسيم

الدمع من عينى كما الضحكه

يفتّحوا القلب المجمد

يخرّجوا الفكّه

لكل عيل بريزه و لكل بنت ريال

و الباقى للى ع الأعتاب بيستكشف

يفك بيه زنقه

فادخل لقلبه دخلت الصاحب و لا يخونش

بإيده ينعّم القعده و لا يخشنش

يسْلَك نَفَسى من صدره و لا يخشخشّ

تلعب حروفى ع اللسان و إيه ذنبى؟

يا عارفين بالكلام قولوه بلاش يلعب بى

العواف

------

1

العمر المدلدل م الخلاص

_الخلاص المربوط مش كويس_

بيجرى عايز يخرج م العياده

يدوبك دقيقتين

و كان ِنفسه يرد نَفسه ف بطنها

كان اللى حصل حصل

و الدمعه نزلت ع البصل

2

السنين المتشعبطه ف نهايتها

و بتهمل الحاجات دى اللى اسمها أيام و شهور

............بتساعد المجىء السريع لل

3

/الصوت المشروخ بالعرض

/العمر المقصوف بالطول

الخورج الرامى لكل حاجه

الشايل ليكوا

إعلان هاااااااااااااااام

هيثم محفوظ عمل مدونته يا جماعه

الأغانى لسه هنعملها أب لوود بس هو عامل دراسه حلوه

عنوان المدونه

www.makamsaba.blogspot.com

موال لعب السمك

................

ويا البنيه قعدتى ع المصطبه و النيه دى سليمه

لا اطلع بعينى و لا انزل و لا أدقق فى كل تقسيمه

محلاها الصانيه الممليه بلب بطيخ العصر

و مطر الغسيل و لا ريحة المسحوق ف نسمة صيف

تضحك عينيها بكحل ربانى مرحب بكحل المكاحل ضيف

و تغنى ف الننى لمعة ضيا منى

يحمل حنين الصبا من ستى و سيدى كلام

"ما جمّع إلا اما وفّق و بعوده يا أيام"

عدى بتاع السمك..بلعت حبيبتى الريق..كان السمك ميت

أنا قلت و حياة العيون و دى الغيبه تحت الجفون ليكون عشاكى من سمك مٌلعب

و طلعت جرى ع الغيطان فى ندى البرسيم و شوق بنيه للأمان

أحفر الطينه من هنا مالقى و الاقى الطوعم بينادى على يدى

"يا بو القليب أخضر إحفر من هنا تلقى"

و تقولش دا كرم ربك و لاّ كرم ربك

لعب السمك فى الشبك ياخد قلبى و يطير بك

عرّضت قلبى للحطب راح الحطب والع

و قعدت أطبخ السمك بهاراتى من نفسى

إشى صيديه و إشى مقلى و إشى مشوى على نار الهوى مبسوط

و رجعت جرى ف جرى لقيت حبيبى نام

غفّلت ع المصطبه أكلته فى المنام

روح رقصت فى صيدا

.........

الليله فى الضاحيه ساهره العيون صاحيه و الضرع ما بيجف

الضرع بيرضع عيل بيتفزّع لكنه ما بيحف

عامل حساب عيل ماعدش ليه تيل مستنى ييجى يلف

صوت الغارات عالى إتخفى طوالى لما نقرنا الدف

و رقصنا ع الدبكه و إيدينا أهى شابكه إيدينا ما ترجف

* * *

يا ليل آه يا ليل

أكون أنا قنديل و لا كونش أنا انا ديل

و لا كونش أنا انا طرف

موصول بجسم عليل

عمله و موقوف الصرف

إلا من بنك بخيل

* * *

صوت الليالى عويل عزارى بتنوح

و ام الشهيد زغاريد تطلقها بتفرح

بكا العيال عتال و ضهره متجرح

بكره العيال تكبر و ضهرها ينقام

و كل دم بجد هينعمله مقام

* * *

ف صباح العيد تجرى العناقيد ع الأغصان و تبوس الأيد

أغصان حمره..أغصان بيضه..أغصان شفافه سعيده معيده و عايده

زى الدم و قلب الأم و روح رقصت فى صيدا

حكاية المهره أم قرن واحد
--------------

المهره أم قرن واحد عنها حكايتنا يا عيال و شباب و كبار.
ماحدش يعرف من كل سكان الغاب الكرام أو اللئام منين جت.هما بس ف ليله صحيوا على صوت طرئعه، طرئعه جامده و لاقوها و اقفه وسط ساحة الأسد و قرنها الابيض بيضوى ضى.قرنها الابيض منور كل الحى.
مس الضى القلوب فتحها
اتجمعوا السكان حوالين ستنا المهره
القروده بنوالها إسطبل حندوق
أرانب الجبل حفرولها حفره كبيره
و الفيل ملاها بالميه
أما الغزاله كانت بتشرف ع العمل
وعنيها مش طيبين
قالت الغزاله"فات زمان المختره و جه زمان المخمخه"
عين الغزاله. . مش طيبه
غل الغزاله . . غل بغبا
قلب الغزاله شارب مرار
غنى الغزاله. . مندبه
قرن الغزاله صبح شيطانى المنظر و عنيها بتطق الشرار
و انا الراوى لابتنك و لا اتمنظر و ع الصدق خدت قرار
مهرتنا مهره كريمه ولا حد عارف من سما نازله ولا طالعه من قرار
مش م الأسد الخوف و لاعمره كان م الأسد
الخوف م الى ف حنجرتها حبلين من مسد
و دموعها من صبار
و متستغربوش يا عيال يا شباب يا كبار إن ماجدتش سيرة الأسد. الأسد نايم و سط اللبوات.كل مايقوم يأكلوه من لحم الصدر و الافخاد ينام تانى.

عيال صوف

.

حبة عيال ماشيين على جسر المقال

ولا يملكوش غير اللسان سوى طوبه

عروق الجسر معطوبه

بسوس بيسوس دماغاتهم

يمين يمين شمال شمال

"صدق اللى قال"

ما صدقشى دا كان هاجّاص

سارق خيوط الشمس من عينى

و غازلها كما الخواص

كلام يبان عليه أخضر

بيتمخطر على الشفه

لكنه سمين و ملهلط

عليه حبة عيال تلبد

كلية الخروف

لابد عليها صوف

ولا عمره يتفرفط

ع الحدود

يا مّا الندا جالى من أرض سلسالى

يا مّا ماتربطينيش ف زل اللقمه و عيالى

ياللى أنت و اقف ع الحدود و مش هامّك ضرب اليهود

بدى أكون عندك

أمى بتدعى ف السجود لكل شبر و راح يعود

و لبسمه فى خدك

و ابويا واقف ع البيبان مستنى فجر هناك يبان

من طلقه من يدك

كيف الحيارى السهر

كيف الشلل الدعا

كيف الكلاب الهوهوه

و كيفك أنت طلقتين مش ف الهوا

و صاروخ موجه واخد على خطره من الهدف القريب

لو كان بخطره

لالف و راح على تل أبيب

موال النسيم

يا نسيم يا قبالى

على إيه تشيل شالى؟!

لافف بأحوالى

وجى معاك على طول

إن طال حرّى مايطول

حرّى من عين الغول

و الغول عينيه قادحه

شرر مالوش غالى

و ف وسط الحر الشوم

شافت عيونى وشوش

يشتبهوا00 مايشتبهوش

مش همى ولا بالى

الحر كروتهم

كسر قلل بيتهم

و قاد ناره ف غيطهم

لاهاليبها ف علالى

ياعينى ع القمحه

ف الحر مش لمحه

أختها القمحه

و العيش ف المشمش

مشمشنا و لهطتوا

و نقانا كسّرتوا

و اهو غيطنا أهو حرقتوا

عشان منبدرشى ف الفجر أرواحنا

و نرويها بحنين

تطرح ف مرواحنا

و نغنى موالى

يا نسيم يا قبالى

على إيه تشيل شالى؟ّ!

لافف بأحوالى

و جى معاك على طول

ف زمان كلامنا يبان
ف زمان يتغطى
اللى نطق إنسان
و اللى انكتم وطى

محمد
أبو الفتوح